GENSAN – Gibutyag ni Police Brigadier General Arnold Ardiente, Regional Director sa Police Regional Office 12 nga samtang si PCol. Nicomedes Olaivar Jr. pa ang City PNP Director sa mga kapulisan sa dakbayan sa Heneral Santos, anaa gihapon sa iyang kontrol ang General Santos City Police Office.
Gibutyag ni Ardiente nga gipadala na sa ilang buhatan ngadto sa lokal nga kagamhanan ang opisyal nga report may kalabotan sa direktiba nga naggikan sa Camp Crame, ug karon gihulat pa ang pormal nga tubag sa LGU.
Gidugang niini nga nagsumite na usab sila og listahan sa mga personnel nga sakop sa deliberasyon alang sa posisyon para sa city director ug provincial director tungod kay daghan ang angayan ug kwalipikado nga kandidato.
Gipasabot usab ni Ardiente nga ang tanang lakang nga ilang buhaton magdepende sa klaro nga direktiba sa Camp Crame.
Usa niini ang assessment sa performance sa mga opisyal, lakip na si Olaivar, nga matod niya nagpadayon sa maayong pagtrabaho ug pagtuman sa mga gimbuhaton isip police officer.
