Permanente nang gidili sa Indonesia ang tanang kalihokan sa pagsakay og elepante sa nasod.
Kini human sa pag-isyu sa Circular Letter No. 6 sa 2025 sa Directorate General of Natural Resources and Ecosystem Conservation sa Ministry of Forestry sa Indonesia, nga opisyal nga nagtapos sa mga kalihokan sa pagsakay og elepante sa tanang pasilidad sa konserbasyon ug turismo sa tibuok nasod, sumala sa South China Morning Post.
Ang Bali Natural Resources Conservation Agency, nga nagdumala sa implementasyon niini, nagpasidaan nga ang mga pasilidad nga dili motuman sa mga regulasyon mahimong mabawi ang ilang mga permit sa operasyon.
Kini usa ka makasaysayanong lakang alang sa kaayohan sa mga hayop, labi na ang mga elepante nga dugay nang gigamit isip kalingawan sa mga turista.
