Gihunong na sa Philippine Statistics Authority (PSA) ang pag-imprinta sa Philippine Identification System (PhilSys) ID o National ID.
Gipasabot ni PSA Social Protection Use Cases Division Chief Ma. Fides Wilma Marquez sa Senate Committee on Social Justice, Welfare and Rural Development niadtong Enero 28 nga ang paghunong tungod sa problema sa pag-imprinta sa card.
Sumala ni Marquez, dili pa sigurado kung kanus-a ipadayon ang pag-imprinta. Apan, matod niya nga nagpadayon pa ang pagparehistro para sa National ID.
Gidugang sa PSA nga mga 90 milyon nga mga Pilipino ang nakarehistro na ug na-isyuhan og PhilSys number.
Matod ni Marquez nga ang PhilSys number igo na aron pamatud-an ang identidad sa usa ka indibidwal tungod kay kini nakaagi na sa biometric verification.
Dugang niya nga kadtong wala pa’y pisikal nga card mahimong mag-download sa digital nga bersyon sa National ID pinaagi sa eGovPH app.
