Nag-atubang ang aktres nga si Rhian Ramos og reklamo sa National Bureau of Investigation (NBI); kauban ang beauty queen-actress nga si Michelle Dee ug ang beauty queen turned to politician nga si Samantha Panlilio.
Base sa reklamo sa personal driver ni Ramos nga silang tulo nagtinabangay sa pagpasakit o ‘pagtorture’ kaniya sa balay sa aktres kaniadtong Enero 17.
Miingon siya nga bag-o lang sila gikan sa taping sa aktres nga si Ramos sa dihang gitabangan siya sa mga bodyguard sa aktres sa pagkulata kaniya sa iyang balay sa ika-39 nga andana sa usa ka residential complex sa Makati.
Misulay siya sa paghikog apan nasangit siya sa kable ug natugpa sa ika-25 nga andana.
Samtang nanaog, nakita siya pag-usab sa mga bodyguard sa aktres ug gipabalik siya sa ika-39 nga andana diin giingong miabot sila si Dee ug Panlilio.
Giingon nga gihuboan ni Dee ang biktima ug gipugos sa paghikap sa iyang pribadong parte sa lawas samtang nagbubo usab og ilimnong makahubog.
Didto, padayon siyang gikulata sa mga bodyguard sa aktres ug giingong gipugos sa pag-inom og ihi.
Ang biktima anaa na karon sa kustodiya sa Volunteers Against Crime and Corruption (VACC).
Una nga gisang-at ni Dee ang kaso sa pagpangawat batok sa biktima tungod sa giingong pagpangawat sa iyang mga litrato nga naa sa iyang armband, nga miresulta sa iyang pagkabilanggo sa Makati City jail sulod sa tulo ka adlaw.
Gibuhian lang siya human gibasura sa Makati City Prosecutors office ang maong kaso.
