GENSAN- Gipahimangno ni Lieutenant Junior Grade Gideon Dulnuan, spokesperson sa Coast Guard District Southern Mindanao nga siguruhon nga ang mga bangka ug barko dili overloaded, seaworthy, ug adunay igo nga safety equipment ug life-saving devices sama sa life jackets ug communication equipment.
Gibutyag niini nga importante usab nga makig-kooperar una sa Philippine Coast Guard ug magpa-clearance sa dili pa molakaw, ug hulaton ang opisyal nga weather advisory sa PAGASA.
Gidugang pa sa nasampit nga opisyal, ang tanang bangka kinahanglan makasunod sa mga kinahanglanon ug safety regulations nga gipatuman sa gobyerno.
Padayon usab ang inspeksyon nga ginahimo sa PCG aron masiguro nga ang mga vessel luwas ug compliant sa mga rekositos, ilabi na ang presensya sa communication ug life-saving equipment.
Pinaagi sa maong pahimangno, gilauman sa Coast Guard nga mas modaghan ang kahibalo ug kahandam sa mga mag-layag sa kadagatan, ug malikayan ang mga insidente nga mahimong moresulta sa pagkawala sa kinabuhi ug kabtangan.
