Niabot na sa New York si Presidente Nicolás Maduro sa Venezuela human gikataho nga gidakop sa mga sundalong Amerikano sa iyang pinuy-anan sa Caracas.
Usa ka puti nga FBI Boeing 757 ang nitugpa sa Stewart Air National Guard Base mga alas 4:30 sa hapon, oras sa Amerika, sumala sa mga taho.
Wala madugay, misakay sa eroplano ang mga pulis. Mga 30 minutos ang milabay, ang mga indibidwal nga gituohang sila si Maduro ug ang iyang asawa nga si Cilia Flores, uban sa pipila ka mga opisyal, nakita nga hinayhinay nga nanaog gikan sa eroplano.
Sumala sa report, si Maduro ug Flores gidakop sa kaulohan sa Venezuela niadtong Biyernes sa gabii ug gibalhin dayon sa Estados Unidos tungod sa mga kaso sa pagpamaligya og droga.
Ang magtiayon gituohan nga gidala sa Puerto Rico sa wala pa molupad paingon sa New York City.
Si Maduro ug ang iyang asawa nakita nga misakay sa eroplano sa Ramey Base, nga nahimutang sulod sa Rafael Hernández International Airport sa Aguadilla.
Gikumpirma usab sa mayor sa Aguadilla nga si Julio Roldan sa social media nga ang lider sa Venezuela gikataho nga miagi sa ilang siyudad.
Wala pay opisyal nga pahayag gikan sa mga gobyerno sa Venezuela o Estados Unidos bahin sa insidente.
