Nakapahingangha si Donnalyn Bartolome sa minilyon nga mga subscriber human niya gipahibalo nga mopaalam na siya sa vlogging.
Sa iyang pinakabag-o nga vlog nga giulohan og “The Gift Reverse,” nakita si Donnalyn nga naghatag og mga mahalon nga regalo sa iyang suod nga mga higala ug sa iyang uyab nga si JM de Guzman. Apan sa pagtapos sa vlog, gipaambit niya ang usa ka mas personal ug bug-at nga pagpadayag.
Giangkon sa content creator nga daghan pa ang dili na niya mapaambit sa publiko ug tungod niana, dili na niya hingpit nga mapakita ang iyang tinuod nga kaugalingon atubangan sa kamera, usa ka rason nganong gipili niya nga mohunong.
Wala kapugngi ni Donnalyn ang pagka-emosyonal samtang nagpasalamat sa iyang mga tigpaluyo.
Isip katapusang regalo sa iyang mga fans, gipahibalo ni Donnalyn nga iyang ipagawas ang katapusang 10 ka vlog ug nangayo og mga sugyot sa iyang mga followers kung unsa ang gusto nilang tan-awon.
