Nahukman sa Office of the Ombudsman nga dismissed ang kasong giatubang ni kanhi Cebu Provincial Governor Gwendolyn Garcia may kalabotan na sa pag-isyu og Special Permit sa desilting sa Mananga River sa Talisay City, Cebu.
Giduso ang maong kaso ni Moises Garcia Deiparine diin nagpunto ang alegasyon sa kalapasan daw ni Garcia sa pag-isyu sa maong permiso nga walay saktong pagsubay sa mga lagda sa balaod nga nagprotektar sa kalikupan.
Kauban ni Garcia sa maong kaso kay si Anthony James C. Limchesing, ang General Manager sa Shalom Construction kinsa maoy responsableng kontraktor ang mi-desilt sa suba sa Mananga.
Matod sa maong desisyon nga na-dismiss kini tungod sa kakuwang og “probable cause.” Pinetsahan ang desisyon niadtong Agosto 29, 2025 nga pinirmahan sa mga Special Panel of Prosecutors sa Ombudsman.
Kahinumduman nga depensa sa kampo ni Garcia nga miisyu kini sa maong permiso tungod sa dinaliang panginahanglan sa Sugbo og tinubdan sa tubig tungod sa huwaw nga nasinati niadtong panahon sa ting-init sa tuig 2024.
