Aduna nay napili ang International Criminal Court prosecutors og tulo ka medical experts nga mosusi sa panglawas ni kanhi Presidente Rodrigo Duterte.
Mga eksperto sila gikan sa behavioral neurology, neuropsychology ug forensic psychiatry.
Base sa siyam ka panid nga dokumento nga gipagawas sa Office of the Prosecutor nga gipirmahan ni Deputy Prosecutor Mame Mandiaye Niang, ilang gisuportahan ang pagtudlo sa usa ka multidisciplinary panel of experts aron susihon ang kanhi Presidente kon angayan ba siyang moatubang sa husay.
Ang mga eksperto nipadayag sa ilang kaandam nga moserbisyo sukad karong buwana.
Ang dokumento nag-ingon usab sa pagsupak sa Prosekusyon sa pahayag sa Depensa nga ang pagtudlo sa mga eksperto mahimong adunay isyu sa “bias”.
Ang medikal nga opisyal sa International Criminal Court (ICC) wala nay pagtugot kaniadto sa pagsusi sa kahimsog sa kanhi presidente.
Kahinumduman nga ang kanhi presidente nasikop niadtong Marso tungod sa iyang kampanya batok sa ilegal nga drugas dihang presidente pa siya sa nasud.
