Nagtanyag ang Department of the Interior and Local Government (DILG) og P50 milyones nga pabuya alang sa impormasyon nga makatabang sa pagdakop kang Senador Ronald “Bato” dela Rosa, nga gi-isyu-han og arrest warrant sa International Criminal Court (ICC).
Gipahibalo ni DILG Secretary Jonvic Remulla ang maong pabuya atol sa press conference ning Biyernes, diin gihulagway niya ang senador nga “armed and dangerous” samtang gipangita kini sa mga otoridad.
Samtang, gihatagan sa Philippine National Police (PNP) si Dela Rosa og usa ka semana aron mosurender sa mga otoridad.
Matod ni Remulla, gihatag na sa gobyerno ang angay nga pagtagad ug pagtahod sa senador isip opisyal sa nasud, apan giakusahan niya kini nga nagtago.
Gipasabot usab ni Remulla nga panahon na aron ipatuman ang hustisya alang sa mga biktima sa giingong mga pagpatay nga nalambigit sa kampanya batok sa ilegal nga droga sa administrasyon ni kanhi Presidente Rodrigo Duterte.
Giingong nagtago si Dela Rosa sukad sa iyang pagbiya sa Senado niadtong Mayo, human gisulayan sa mga otoridad ang pagpatuman sa arrest warrant sa ICC nga may kalabotan sa iyang giingong papel sa mga pagpatay atol sa kampanya batok sa ilegal nga droga.
Gipadayag sa ICC ang maong warrant niadtong Mayo 11, tungod sa makataronganong basehan nga naglambigit kang Dela Rosa sa krimen batok sa katawhan nga murder.
Apan, ang mga alegasyon batok kaniya anaa pa sa proseso sa hudisyal ug ang pag-isyu sa warrant dili pa kataposang hukom nga nagpasabot sa iyang pagkasad-an.
