Gikompirmar ni Agriculture Secretary Francisco P. Tiu Laurel Jr., nga ilang target nga lugwayan ang pagpatuman sa rice import ban hangtod sa katapusan ning tuiga.
Ang kalihim mihimo sa pamahayag atol sa iyang pag-atubang sa House of Representatives Committee on Agriculture hearing.
Matud pa ni Laurel nga tumong niining maong lakang mao ang paghatag ug igong proteksyon sa mga lokal nga mag-uuma batok sa mga kapildihan nga padayon nilang nasinati.
Kini tungod kay nagpabiling ubos ang presyo sa bugas sa nasud tungod sa epekto sa oversupply.
Nagtuo ang kalihim nga ang importasyon sa bugas humay kinahanglang subay sa panginahanglanon karon sa nasod.
Base sa datus, kinahanglan lang nga mo-import ang nasud og 3.6 milyones ka toneladang bugas sulod sa usa ka tuig, apan sa katapusan sa Septiyembre, ang nasud naka-import na og 3.5 milyones ka toneladang bugas.
