Dili balido o walay gahum ang hangyo sa Senado nga ipaubos sa house arrest si kanhi Presidente Rodrigo Duterte , matod ni ICC Accreted Lawyer and Center for International Law Executive Director Atty. Gilbert Andres.
Kini human nakakuha ang Senado og 15 ka boto nga nag-aprobar sa dinaliang hangyo sa International Criminal Court (ICC) nga ipaubos sa house arrest si Duterte.
Ang resolusyon nag-awhag sa ICC sa pagtudlo og doktor nga mosusi sa panglawas ni Duterte ug madeterminar kon makaagwanta ba siya sa regular nga detensyon.
Kung mapamatud-an sa doktor nga mahimong mograbe ang iyang kahimtang sa iyang pagkabilanggo karon, gihangyo sa Senado nga tugutan siya nga magpabilin sa ilawom house arrest
Apan matod ni Atty. Andres, dili balido ang hangyo sa Senado nga ipaubos sa house arrest si Duterte.
Gipasabot ni Atty. Andres nga ang International Criminal Court (ICC) walay politikanhong konsiderasyon, ug ang basehan lamang niini sa paghimog desisyon mao ang Rome Statute ug ang gisumiter nga ebidensya.
Dihang gipangutana kon aduna bay miaging kaso nga susamang resolusyon ang gisang-at sa ICC, si Andres niingon nga wala siyay nahinumdoman nga nahitabo.
