Gibutyag sa Commission on Audit (COA) ang upat ka bag-ong kaso sa giingong ‘ghost projects’ nga mobalor og mokabat sa P350 milyones, may kalabotan sa flood control projects ubos sa Department of Public Works and Highways (DPWH) – Bulacan 1st District Engineering Office.
Matod sa fraud audit report sa COA, ang maong mga proyekto gikonsiderar nga nahuman, apan sa pagsusi, nasuta nga walay mga istruktura nga nagbarog o substandard ang pagtukod.
Lakip sa nalambigit nga mga kontraktor mao ang SYMS Construction Trading, nga adunay duha ka flood control projects sa Baliuag ug Pulilan, apan ang duha wala makita sa lugar.
Apil usab ang Topnotch Catalyst Builders Inc. alang sa usa ka riverbank protection project sa Plaridel, nga wala usab aktuwal nga ebidensya sa usa ka proyekto sa maong dapit.
Apil usab ang Triple 8 Construction and Supply Inc., alang sa usa ka riverwall project sa Barangay Pagala, Baliuag, nga matod sa COA, layo pa sa gitakdang petsa sa pagkompleto.
Kahinumdoman nga ang DPWH-Bulacan 1st District Engineering Office kanhi nalambigit sa kaso, nga naglakip nila ni District Engineer Henry Alcantara, Assistant District Engineer Brice Hernandez, ug uban pang mga engineer. Apil usab ang mga tag-iya ug opisyal sa maong mga construction firms.
Mahimong mag-atubang og kasong graft, malversation, ug falsification of documents ang kanhi mga opisyal.
