Hugot nga gipanghimakak ni kanhi Senador Antonio Trillanes IV ang pasangil nga nibisita siya ni kanhi Presidente Rodrigo Duterte sa International Criminal Court (ICC) detention center sa The Hague, Netherlands.
Matod ni Trillanes, walay kamatuoran ang pamahayag ni Davao City 1st District Rep Paolo Duterte nga giingong gipadala siya sa gobyerno sa Pilipinas aron mohimo og “welfare check” sa kanhi presidente.
Gitumbok usab sa kanhi senador nga si Duterte adunay 24/7 access sa telepono ug makahimo sa pagkontak sa iyang anak nga si Bise Presidente Sara Duterte bisan unsang orasa.
Gitawag usab niya nga bakakon ang managsuong Duterte kay dili tinuod nga nawad-an og panimuot ang kanhi presidente samtang anaa sa kustodiya sa ICC.
Gipaambit usab niya ang pipila ka mga detalye sa mga kondisyon sa pasilidad diin gitanggong si Duterte.
Matod niya, ang mga dinakpan dunay kaugalingong lawak nga may sukod nga 10 square meters, dunay kaugalingong banyo ug dunay access sa common areas sama sa kusina, recreational area, ug uban pa.
