Nagmando ang korte sa pagdakop kang kanhi Philippine Charity Sweepstakes Office (PCSO) General Manager Royina Garma tungod sa pagpatay kang PCSO board secretary Wesley Barayuga kaniadtong 2020.
Sa warrant of arrest nga giluwatan sa Mandaluyong Regional Trial Court (RTC) branch 279, gimando usab nga dakpon sila si kanhi National Police Commission (NAPOLCOM) commissioner Edilberto Leonardo, police officials Jeremy Causapin, Santie Mendoza, ug Nelson Mariano tungod sa kasong murder ug frustrated murder.
Matud ni PNP spokesperson Brig. Gen. Randulf Tuaño, ilang isilbi ang nasangpit nga warrant of arrest bisan unsa pa ang posisyon niini.
Sa lima ka akusado, si Mendoza lang ang anaa sa floating status ubos sa kustodiya sa Personnel Holding and Accounting Unit (PHAU) samtang si Mariano natangtang sa serbisyo ug si Causapin ni-resign sa iyang katungdanan.
Kahinumduman nga si Barayuga gipusil samtang sulod sa iyang sakyanan sa wala mailhing mga suspek nga nagsakay og motorsiklo niadtong Hulyo 30, 2020 sa Mandaluyong City, diin naluwas ang iyang drayber.
