Dili na madayon ang gikatakdang pagbiyahe ni Pope Leo XIV ngadto sa Assisi, Italy, sa sunod semana subay sa tambag sa iyang doktor samtang nagpadayon siya sa pagkaayo gikan sa bag-o lang nga operasyon sa baga.
Ang Santo Papa gikatakdang mobisita karong umaabot nga Martes aron sa pagtimaan sa ika-40 nga anibersaryo sa World Day of Prayer for Peace, nga gitukod ni San Juan Pablo II.
Matod sa Vatican, gitambagan sa mga doktor ang Santo Papa nga likayan una ang pagbiyahe sa pagkakaron aron mahatagan og higayon ang iyang lawas nga hingpit nga makaayo gikan sa bag-o lang nga operasyon alang sa kanser sa baga. Hinuon, magpadala na lang siya og mensahe ngadto sa mga nag-organisar sa kalihokan, nga nagdala sa tema nga “Disarmed and Disarming Peace.”
Samtang, nagpahibalo ang Vatican nga ang pagkaayo sa Santo Papa nagpadayon nga makanunayon ug paspas—usa ka kamatuoran nga gipamatud-an sa positibong resulta sa gihimong follow-up nga X-ray sa iyang dughan. Tungod niini, girekomendar sa iyang mga doktor nga i-postpone una niya ang iyang pagbiyahe sakay sa helicopter paingon sa Assisi.
Sa sunod nga bulan, sa Nobyembre, si Pope Leo XIV gikatakdang mobiyahe ngadto sa Latin America alang sa usa ka pagbisita sa Uruguay, Argentina, ug Peru.
