GENSAN- Gilaoman nga maklaruhan ang tanang mga isyu nga milutaw batok sa South Cotabato II Electric Cooperative Inc o SOCOTECO II sa gitakdang stakeholder’s forum nga ilang ipahigayon ugmang adlawa.
Ang maong aktibidad ipahigayon sa bag-ong Administration Building nga nahimutang sa Barangay Apopong Gensan.
Tumong niini nga makahatag og mga update ug pagpasiugda sa abri nga diskusyon kabahin sa nag-unang mga isyu nga giatubang sa kooperatiba.
Apil niini ang kasamtangang sitwasyon nga may kalabotan sa ‘regression’ sa kategoriya sa SOCOTECO II ilabi na usab ang pagpailawom sa mga flagship program ug inisyatibo.
Pagatuki-on usab ang pakig-uban sa mga miyembro consumer owners ug ang benepisyo nga ilang makuha sa komunidad. Lakip usab ang mga plano alang sa operational recovery ug ang estratehikong direksyon nga padulngan sa umaabot.
Pipila pa sa giandam nga lakang mao ang pagpresentar sa opisyal nga baruganan sa SOCOTECO II kalabot sa isyu sa ‘privatization’ ug sa posibilidad sa joint venture agreements.
Ang maong forum gilauman nga mahimong dalan aron mas mapalig-on pa ang relasyon sa kooperatiba ug sa mga member-consumer pinaagi sa tin-aw nga pagtubag sa mga hagit nga giatubang sa sektor sa serbisyo sa kuryente.
