GENSAN- Nanawagan si Atty. Jong Gonzales, Department Head sa Public Saftey Office (PSO) sa tanang pasahero sa dakbayan sa Gensan nga likayan ang pagbayad og sobra nga pamasahe nga lampas sa taripa.
Giawhag niya ang publiko nga kung adunay tricycle driver nga maningil og sobra, kuhaon dayon ang impormasyon sa driver sama sa pangalan, plate number sa tricycle, ug kon mahimo kuhaan kini ug litrato aron gilayong isumite sa ilang buhatan.
Gipasiugda ni Atty. Gonzales nga ang ilang opisina andam nga mohimo sa aksyon ug kini ilahang isumite sa Land Transportation Franchising and Regulatory Board (LTFRB) aron mahatagan ug hustong aksyon sa reklamo.
Dugang pa niya, importante gayud nga ang mga driver ug pasahero magtinahuray ug mosunod sa mga balaod trapiko ug balaod sa sector sa transportasyon aron malikayan ang kalibog ug kasamok sa komunidad.
