Gipasalig ni Agriculture Secretary Francisco Tiu-Laurel Jr. sa publiko nga aduna pay igong bugas ang National Food Authority (NFA) sa mga bodega niini aron suportahan ang padayong pagpalapad sa Benteng Bigas Program sa nagkadaiyang dapit sa nasod.
Kini nga pasalig luyo sa paglusad sa baratong bugas nga programa ilabina sa sektor sa transportasyon, nga gipahigayon kagahapong adlawa.
Tumong sa programa nga matabangan ang mga drayber ug operator sa sektor sa transportasyon pinaagi sa paghatag ug barato nga bugas.
Matod pa ni Secretary Tiu-Laurel, dako pa ang mga bodega sa NFA, mao nga padayong gi-release ang stocks aron mahatagan og dalan ang humay nga mapalit sa mga lokal nga mag-uuma sa nasud.
Target sa Department of Agriculture (DA) nga makabaligya ug gibana-bana nga usa ka toneladang bugas kada adlaw ubos sa Benteng Bigas Program.
Plano usab sa departamento nga palapdan ang maong programa aron makabaligyag tulo ka toneladang bugas matag adlaw sa Disyembre.
