Walay pagduha-duha nga giingon ni Pasig City Mayor Vico Sotto ug gitawag niya ang magtiayong Discaya, mga tag-iya sa construction firms nga nalambigit sa mga anomalosong flood control projects, nga habitual liars.
Si Mayor Sotto niingon nga ang mga Discaya ilado na sa lokal nga pulitika ug construction circles sa unang paglingkod palang niini isip mayor.
Namatikdan niya nga daghang mga istorya ang nagpalibot bahin sa ilang mga transaksyon, apan gilimitahan niya ang iyang pagpamatuod sa mga butang nga personal niyang naobserbahan.
Gitumbok usab niya nga ang mga bag-ong imbestigasyon ug ang mga taho nagbutyag kung unsa ka lawom ang pagkagamot sa construction empire sa mga Discaya.
Dugang pa niya nga halos tanang mga kompanya adunay pending tax deficiencies, ang uban sa Bureau of Internal Revenue (BIR) ug sigurado sa lokal nga kagamhanan.
Gipasabot ni Sotto nga samtang nag-apil-apil pa sa local bidding ang mga kompanya sa Discaya kaniadtong mayor pa siya, tungod kay hugot nga gipatuman sa Pasig ang open ug public bidding.
Bisan og gagmay ang mga kontrata nga ilang nadaog sa Pasig, namatikdan niya nga ang mga kontrata gikan sa Department of Public Works and Highways (DPWH) nikabat og dagkong kantidad.
Direkta usab niyang gikuwestiyon ang kredibilidad sa magtiayon ilabi na nga ang ilang sworn statement giingong gipaubos sa ilang kita.
Gibiaybiay usab ni Sotto ang pangangkon sa pamilya nga dunay mga higayon nga mawad-an matod sila og kwarta.
Aron pagpalig-on sa iyang punto, gilista ni Sotto ang mga numero nga nagpamatuod nga imposible ang ilang pangangkon.
Matod ni Sotto nga ang ilang kaugalingong public statements nagbutyag sa mga kontradiksyon sa ilang depensa.
Gipahimangnoan usab sa mayor nga bisan tinuod nga adunay kurapsyon sa nagkalain-laing bahin sa gobyerno, ang mga Discaya gituyo nga libugon ang isyu pinaagi sa paghisgot sa daghang mga ngalan nga walay ebidensya.
