Nihangyo ang mga abogado ni kanhi Presidente Rodrigo Duterte pag-usab sa International Criminal Court (ICC) pre-trial chamber nga aksiyonan dayon ang ilang petition for provisional release, usa ka bulan sa dili pa ang gikatakdang confirmation hearing sa kanhi lider sa The Hague.
Sa usa ka gibag-o nga dokumento nga gipetsahan Agosto 19, ang depensa nangatarungan nga kinahanglan nga buhian dayon si Duterte sa bisan unsang mga kondisyon nga gitakda sa korte.
Base sa mosyon, mahimong dili motambong si Duterte sa confirmation proceedings, apan kon gikinahanglan, mahimo kini pinaagi sa videoconferencing. Dugang pa, gipasalig sa depensa nga ang mga kondisyon sa pag-monitor ug mga pagdili sa pagkontak mahimo usab nga masiguro pinaagi sa [REDACTED].
Ang nanguna nga abogado ni Duterte, si Nicholas Kaufmann, gisaway usab ang posisyon sa Prosekusyon nga ang usa ka ad hoc nga kasabutan sa kooperasyon kinahanglan alang sa temporaryo nga pagpagawas. Matod niya usa kini ka ilusyon tungod kay duha ra ka nasud ang adunay ingon niini nga kasabutan sa ICC.
Ang depensa miinsistir nga [GINA-REDACTED] ug andam nga motuman sa tanang kondisyon nga gipahayag sa Artikulo 4(2) sa Model Agreement on Interim Release.
Sa miaging bulan, nihangyo usab ang kampo ni Duterte nga i-postpone sa ICC ang desisyon niini sa ilang petisyon hangtod nga makompleto sa depensa ang tanang gikinahanglang impormasyon.
Angayang obserbahan nga si Duterte anaa na sa detention facility sa ICC sukad sa tunga-tunga sa Marso human siya gitugyan sa mga awtoridad sa Pilipinas ngadto sa international tribunal, base sa hangyo sa Interpol.
Si Duterte, ang ika-16 nga presidente sa nasud, nag-atubang og mga kaso sa mga krimen batok sa katawhan kalabot sa liboan ka mga pagpamatay ubos sa iyang war on drugs, diin ang mga menor de edad usa sa mga biktima.
