Gipalig-on sa Korte Suprema ang desisyon sa lower court nga nag-absuwelto kang Datu Akmad “Tato” Ampatuan sa kasong murder kalabot sa maduguong 2009 Maguindanao massacre nga mipatay sa 58 ka tawo.
Ang kaso naggikan sa usa ka apela sa estado nga naghagit sa naunang desisyon sa Court of Appeals ug sa Quezon City Regional Trial Court nga nag-absuwelto kang Datu Akmad.
Base sa desisyon sa First Division sa Korte Suprema, walay igong ebidensiya aron ipakita ang aktuwal nga partisipasyon o pakigkunsabo ni Datu Akmad sa krimen, bisan pa nga mitambong siya sa mga miting diin giplano ang mga pagpatay ug mipadayag sa iyang pag-uyon sa plano.
Giklaro sa Korte nga dili igo ang kahibalo, pag-apruba, o suporta sa plano aron mapasakaan og kasong conspiracy nga walay konkretong aksyon o partisipasyon sa krimen.
Ang Korte Suprema midugang nga bisan og gipadala niya ang iyang tawo nga si Talembo Masukat, kinsa nalambigit usab sa krimen, dili gihapon kini igo nga ebidensya sa pag-ingon nga siya kakunsabo.
Sa katapusan, ang Korte miinsister nga ang iyang relasyon kang Datu Andal Sr. isip iyang umagad nahisakop sa probisyon sa Revised Penal Code nga naghatag ug exemption sa liability sa accessory sa usa ka krimen kon paryente siya sa nag-unang akusado.
Kahinumduman nga usa si Datu Akmad sa gipasakaan og 58 ka ihap sa pagpatay kalabot sa Maguindanao massacre.
