Nakit-an ang tulo ka mga barko sa China Coast Guard (CCG) sa usa ka bracketing pattern sa Batanes.
Kini base sa monitoring sa US maritime expert Ray Powell.
Matod pa nga ang China Coast Guard vessels 4304, 3301 ug 3304 nagpabilin sa bracketing pattern kagahapong adlawa, Agosto 8.
Dugang usab nga ang bracketing nagpasabot nga ang mga barko sa China Coast Guard nagpatrolya sa silangan ug kasadpang bahin sa Batanes.
Ang China Coast Guard vessel 4304 nakit-an 60 nautical miles (NM) kasadpan sa Batanes, samtang ang China Coast Guard vessels 3301 ug 3304 katapusang nakit-an sa gibana-bana nga 70 nautical miles gikan sa silangang bahin sa isla nga probinsya.
Sumala ni Powell nga mahinungdanon ang maong kalambuan tungod kay matud pa niya wala pa makita ang China Coast Guard nga nagpahigayon og intrusive patrols sa silangang bahin sa kapupud-an sa Pilipinas kaniadto.
Kahinumdoman nga sukad kaniadtong Huwebes, ang mga barko sa China nabantayan nga moagi sa Bashi Channel, nga gihulagway ni Powell nga usa ka “very unusual track.”
Mao kini ang unang higayon nga miingon siya nga nakakita siya og bisan unsa nga miagi sa Bashi Channel sa iyang daghang tuig nga pag-monitor sa mga barko sa China sa gilalisan nga kadagatan ug silingang katubigan.
