Gipahimangnoan ni Presidente Ferdinand Marcos Jr. ang mga magpatigayon ug pagmaniobra sa presyo sa bugas o humay, o mangingilad sa mga mag-uuma.
Si Presidente Ferdinand Marcos Jr. nipasalig sa iyang ikaupat nga State Of the Nation Address (SONA) sa National Assembly, kagahapon, Hulyo 28, nga “We will go after you, because what we are considered economic sabotage.”
Napamatud-an sa gobyerno nga makabaligya kini og bugas sa tag P20.00 matag kilo, nga dili malugi ang mga mag-uuma.
Matod niya nga karong bag-o malampusong nalunsad ang halin sa bugas nga tag P20.00 matag kilo sa Luzon, Visayas ug Mindanao sama sa San Juan, Pangasinan, Cavite, Occidental Mindoro, Cebu, Bacolod, Guimaras, Siquijor, ug Davao Del Sur.
Tungod sa 113 bilyon pesos nga gigahin sa pagpalig-on sa mga programa sa DA, ilusad kini sa kagamhanan sa tibuok nasod pinaagi sa gatosan ka mga tindahan ug sentro sa KADIWA sa nagkadaiyang local government units.
Sa laing bahin, isip nag-unang solusyon sa taas nga presyo sa baboy, gipalig-on sa gobyerno ang lokal nga produksiyon.
Dugang pa sa pangulo aron hingpit nga maminusan ang presyo sa karne, gisugdan na ang pagbakuna batok sa ASF, ug dugang pa nga palapdan sa gobyerno ang pagbakuna sa tanan.
Ang Presidente namatikdan nga sukad sa pagsugod sa iyang administrasyon, kapin sa 8 milyon nga mga mag-uuma ug mananagat ang nakadawat ug hinabang.
