GENSAN – Ginaandam na karon sa lokal nga kagamhanan sa dakbayan sa Heneral Santos ang usa ka hero’s welcome alang sa Pambansang kamao nga si Manny “Pacman” Pacquiao, human sa iyang makusog nga pakigbisog batok ni Mario Barrios sa Las Vegas.
Kini ang gibutyag ni Gensan City Mayor Lorelie Pacquiao, apan kinahanglan pa kini ug pagtugot ni Manny ang hingpit nga selebrasyon tungod kay gusto ra kini og yano ug simpleng pag-abot.
Gipasalig sa mayor nga respetado gihapon nila ang personal nga hangyo sa boksingero, apan dili malikayan nga dako ang pangandoy sa mga taga-Gensan nga hatagan og mainitong pagdawat si Pacquiao sa iyang pagpauli, bisan pa og tabla ang resulta sa duwa.
Wala pa magbutang og eksaktong petsa ang City Government sa posibleng seremonya, ug gilauman nga sa mosunod nga mga adlaw, mahuman ang panag-istorya tali sa kampo ni Pacquiao ug sa lokal nga opisyal para masiguro kung unsa ang angay nga buhaton.
Si Manny Pacquiao, nga 8-division world champion, nagpabiling halangdon nga simbolo sa Gensan, ug sa kasingkasing sa mga Pilipino nga misuporta sa tibuok yugto sa iyang karera.
