Gisubli sa Commission on Elections (COMELEC) nga ang mga pilde nga kandidato sa 2025 Elections dili mahimong itudlo sa bisan unsang posisyon sa gobyerno sulod sa usa ka tuig human sa eleksyon.
Kini nga pamahayag ni COMELEC Chairman George Erwin Garcia mitumaw human usa ka napildi nga lokal nga kandidato gikan sa Laguna ang nag-post sa social media og hulagway uban sa pipila ka mga opisyal sa gobyerno, lakip ang pagpasalamat sa paghatag kaniya og kahigayonan nga makaserbisyo pag-usab. Subling gipasabot ni Garcia nga klaro ang Konstitusyon ug ang Election Code labot niini.
Matod niya nga gidili ang bisan unsang appointment sa gobyerno usa ka tuig pagkahuman sa eleksyon.
Si Garcia nidugang nga walay kandidato nga mapildi sa bisan unsang eleksiyon ang mahimong matudlo sa bisan unsang posisyon sa gobyerno, o sa government-owned or controlled corporations (GOCCs), o bisan asa sa ilang mga subsidiary, sulod sa usa ka tuig gikan sa eleksyon.
Ang mga malapason, lakip na kadtong naghimo sa pagtudlo, mahimong manubag sa mga kasong kriminal, administratibo, ug sibil.
