Gipadayag sa labing unang Filipino Olympic gold medalist nga si Hidilyn Diaz, ang iyang tinguha nga makatudlo sa University of the Philippines (UP).
“I am happy to inform you that I am excited about the possibility of sharing my experience and learnings and teaching here in your university. I hope it continues,” matod ni Diaz sa iyang pagpamulong isip guest speaker sa recognition rites sa College of Human Kinetics sa UP Diliman niadtong Sabado.
Gihinumdom usab ni Diaz ang iyang makasaysayanong higayon sa pagdaog sa 2020 Tokyo Olympics ug gipaambit niya ang kamahinungdanon sa pagtinabangay ug serbisyo sa komunidad.
Iyang gidasig ang mga graduates sa pag-apil sa grassroots training ug community service programs.
“Hinumdumi, ang tinuod nga kalig-on dili lamang sa pagpas-an sa bug-at nga mga butang, apan sa pagtinabangay ug pagserbisyo sa uban,” dugang niya.
Niadtong 2024, giablihan ni Diaz ang Hidilyn Diaz Weightlifting Academy sa tumong nga mabansay ang mga bag-ong atleta nga mahimong morepresentar sa nasod sa umaabot nga mga kompetisyon.
Sa UP Diliman, ang weightlifting ug weight training nga mga kurso kabahin sa PE ug Sports Science subjects, sumala sa UP CRS ug Office of the University Registrar.
