Nibuhos ang pahasubo sa mga kauban sa industriya ug mga gisuportahan nga artista sa pagpanaw sa batikang showbiz columnist ug talent manager nga si Lolit Solis sa edad nga 78 anyos.
Gipahibalo ang iyang kamatayon pinaagi sa usa ka Facebook post ni aktor nga si Niño Muhlach, nga usa sa mga persona nga suod ug dako og respeto kang Solis.
“Paalam, Nanay Lolit. Dili gyud ka malimtan sa industriya,”
matud pa sa aktor sa maong post.
Si Lolit Solis, o si Leticia Solis natawo kaniadtong Mayo 20, 1947, usa sa labing iladong showbiz columnist ug talent manager sa nasud.
Kilala siya sa iyang prangka nga estilo sa pagsulat ug sa pagdiskobre og mga artista nga nahimong dagkong bituon sa industriya. Usa siya sa mga haligi sa entertainment press ug dugay nga host sa mga talk show sa telebisyon.
Sukad sa dekada 80 hangtod sa 2000s, nahimong impluwensyal si Lolit sa daghang desisyon ug lakang sa karera sa mga artista. Ilado usab siya nga vocal sa mga isyu, hinungdan nga respetado siya sa mga kaubanan sa media ug showbiz industry .
