Mipatim-aw na ang usa sa mga akusado sa pagkawala sa 34 ka mga sabungero nga si alyas ‘Totoy’ og gibutyag ang pipila ka impormasyon bahin sa kaso hinungdan nga giablihan na usab sa mga awtoridad ang imbestigasyon.
Giila si alyas ‘Totoy’ nga si Julie “Dondon” Patidongan ug usa sa gikonsidera nga state witness sa kaso sa mga missing sabungeros.
Kahinumduman nga gibutyag ni Totoy nga kapin sa 20 ka mga aktibong pulis ang nalambigit sa pagkahanaw sa mga biktima hinungdan nga nipasaka og moto proprio investigation ang National Police Commission (NAPOLCOM) gipangunahan ni NAPOLCOM Commissioner Vice Chairperson ug Executive Officer Atty. Rafael Vicente Calinisan.
Sa testimoya ni Totoy, nanghinaot karon ang Philippine National Police Internal Affairs Service (PNP-IAS) nga makapadayon na kini ug makatudlo sa uban nga adunay kalambigitan sa kaso nga wala sa nangaging mga imbestigasyon.
Kini nga bag-ong impormasyon gikonsidera usab nga importante aron mailhan ang ubang mga nalambigit og aron og substansiya ang nagpadayon nga case build up.
Matod ni Internal Affairs Service Inspector General Atty. Brigido Dulay, gipaabot sa ilang buhatan nga sa exposure ni Totoy mas sayon ang pag-uswag sa case build-up sa ilang buhatan ug aduna kini igong impormasyon.
Hinungdan nga nanawagan si Dulay sa mga akusado nga mohatag sa iyang pormal nga gipanumpaan nga pamahayag aron kini mahimong pormal nga magamit sa imbestigasyon.
Sa pagkakaron, nagpadayon ang mga imbestigasyon nga gipasiugdahan sa IAS ug bisan sa NAPOLCOM batok sa pipila ka mga pulis nga giingong nalambigit niining kaso.
Sa pagkakaron gipaabot sa IAS ang mga pamahayag sa mga akusado ug nipasalig nga ilang ipadayon ang pagsunod sa mga lakang ug direksyon nga himuon sa NAPOLCOM sa imbestigasyon aron masiguro nga patas ug hapsay ang imbestigasyon sa kaso sa mga missing sabungero.
Sa laing bahin, angayng hinumdoman nga gikan sa 2021 hangtod 2023, pito ka mga pulis ang nabutyag nga nalambigit sa pagkahanaw sa mga sabungero ug gitangtang sa ilang tagsa-tagsa ka serbisyo.
