Nagpagawas ang Korte Suprema og ‘writ of nature’ batok sa multi-billion peso bridge project nga gipangulohan sa Department of Public Works and Highways (DPWH) ug Department of Environment and Natural Resources (DENR).
Diin nipagawas kini sa nasangpit nga desisyon kalabot sa petisyon nga bag-o lang gisang-at sa Sustainable Davao Movement kon SDM kauban ang uban pa.
Gusto sa mga petitioner nga mahunong na ang pagtukod sa maong proyekto kay maapektuhan matod pa ang bahin sa dakong bay sa Davao City.
Matod nila nga hinungdan usab kini sa kamatayon sa mga coral reef ug bisan sa marine ecosystem sa Paradise Reef, Samal Island ug Hizon Marine Protected Area.
Busa, ilang giisip nga hulga ang proyekto bisan sa mga lokal nga komunidad kansang panginabuhi ang nagsalig lamang niini.
Sa gipahigayong press conference sa Korte Suprema, mismo si Spokesperson Atty. Camille Sue Mae Ting ang mipahibalo sa Writ of Nature.
Dinhi iyang gipaambit ang mga respondents sama sa mosunod, DPWH, DENR, Samal Island Protected Landscape and Seascape Protected Area Management Board ug ang China Road and Bridge Corporation.
Busa, gimandoan sa Korte Suprema ang mga nahisgutan nga magsumite og verified return kalabot sa petisyon sulod sa napulo ka adlaw human madawat ang dokumento.
Gidugang sa tigpamaba nga gi-refer sa Korte Suprema ngadto sa Court of Appeals-Cagayan De Oro uban ang ‘pag-ampo’ sa mga petitioner alang sa Temporary Environmental Protection Order.
Kung asa nalatid dinhi nga tumong niini ang pagpahunong sa pagtukod sa 4-kilometer bridge project sa DPWH, DENR ug usa ka China Corporation.
Ang nasangpit nga proyekto gigahinan og pundo nga P23 billion nga gipaabot nga makapa-paspas sa oras sa pagbiyahe gikan sa Samal paingon sa Davao City og 5 minutos lang.
Ang maong taytayan 4 ka kilometros ang gitas-on, ug giingon nga dakong bahin sa gasto niini ang gipondohan o gipautang sa China.
