Nagsumite og counter-affidavit si Vice President Sara Duterte sa Office of the Ombudsman isip tubag sa mga alegasyon kabahin sa giingong sayop nga paggamit sa confidential funds sa Office of the Vice President (OVP) ug Department of Education (DepEd).
Kahinumduman nga siya ang kalihim sa DepEd sukad tuig 2022 hangtud sa iyang pagluwat kaniadtong Hulyo 2024.
Ang pagsumite sa counter-affidavit kabahin sa gipatuman nga preliminary investigation sa Ombudsman human sa reklamo nga gipasang-at sa House Committee on Good Government and Public Accountability.
Sumala sa report, ang confidential funds nga gigamit sa OVP miabot og P500 milyon, samtang P112.5 milyon ang gigasto sa DepEd sa panahon ni Duterte.
Gawas kang Duterte, siyam pa ka mga opisyal sa OVP ug DepEd ang giapil sa kaso isip mga respondent.
Lakip sa mga alegasyon batok kanila mao ang plunder, technical malversation, falsification of public documents, perjury, bribery, ug betrayal of public trust.
Gihatagan sila og 10 ka adlaw sa Ombudsman sukad sa pagdawat sa maong mando aron makapasa sa ilang tubag, lakip na ang mga affidavit sa mga testigo ug uban pang dokumento nga mosuporta sa ilang panig.
Sumala sa anti-graft body, kung mapakyas sila sa pagpasa sa sulod sa gitakdang panahon, makonsidera nga waiver sa katungod nga mapresenta ug ebidensiya.
