Gisiguro sa Philippine National Police (PNP)nga ilang patubagon sa balaod ang bisan kinsa nga nalambigit sa kaso sa 34 ka mga sabangero nga nawala sukad niadtong 2021.
Matud kang PNP Spokesperson PBGen. Jean Fajardo kini base usab sa direktiba ug tinguha ni PNP Chief PGen. Nicolas Torre III aron maseguro nga mapasakaan og kaso ang mga nalambigit sa maong mga krimen.
Matud kang Fajardo, dili nila tugotan ang bisan kinsa sa kini nga kaso, bisan kung ang mga nalambigit mga sibilyan o taas nga ranggo nga opisyal sa sulod sa ilang organisasyon.
Dugang pa, nagpaabot sila karon sa pipila ka mga detalye gikan sa usa sa mga akusado aron sa katapusan mahimo siyang saksi sa kaso subay sa mga gibutyag sa miaging mga adlaw.
Samtang, gipasalig sa tigpamaba nga pabiling abli ang ilang han-ay aron mahatagan og seguridad ang mga posibleng state witness ug gipasalig nga andam usab ang PNP nga mokooperar sa pagsulbad sa kaso sa labing daling panahon.
