Gapanawagan ang mga drayber sa jeep ug mga drayber sa ride-hailing apps sa gobyerno nga aprobahan na ang ilang hangyo nga pagtaas sa plete isip tubag sa padayon nga pagsaka sa presyo sa produktong petrolyo.
Matod ni Boy Vargas, presidente sa Alliance of Transport Operators and Drivers Association of the Philippines (ALTODAP), dugay na nga naghulat ang mga drayber sa jeep sa tubag sa gobyerno bahin sa ilang petisyon alang sa provisional fare increase nga gisumite tulo na ka tuig ang milabay.
Bisan pa nga naglaum sila nga mahatagan og dugang nga P1 sa plete, nabalaka sila nga basin dili kini maaprubahan.
Gisuportahan usab kini sa Transport Network Vehicle Services (TNVS), nga miingon nga ilang gihangyo ang fare hike sukad pa sa 2023, apan hangtod karon wala pa kini maaprubahan.
Matod nila, ang fuel subsidy temporaryo ra nga solusyon sa padayon nga pagsaka sa presyo sa gasolina.
Kahinumduman nga ang gobyerno naghatag og P2.5 billion nga pondo para sa fuel subsidy ilawom sa 2025 national budget aron matabangan ang mga drayber sa pampublikong transportasyon, mga mag-uuma, ug mga mananagat.
Apan matod ni Presidente Ferdinand Marcos Jr., dili pa kinahanglan ang fuel subsidy tungod miubos na ang presyo sa lana human sa ceasefire tali sa Israel ug Iran.
