Nagduda karon ang Philippine Navy nga mas dakong barko ang tinubdan sa kapin 1.5 ka toneladang shabu nga na-intercept sa ilang mga personnel 50 ngadto sa 60 nautical miles gikan sa baybayon sa Zambales.
Ang shabu gibana-banang mobalor og P10 bilyones ug na-intercept gikan sa usa ka gamayng barko nga pangisda nga giluwanan sa usa ka langyaw ug upat ka mga mananagat nga Pinoy.
Sa press conference, gipahibalo ni Northern Luzon Naval Command Commander Commodore Edward Ike De Sagon nga wala pa nila matumbok ang barko nga tinubdan sa ilegal nga drugas.
Nagtuo usab ang ilang han-ay nga plano nilang ihulog ang gibanabanang 50 ka sako sa shabu sa West Coast sa Luzon.
Nasayran nga ang interception sa maong Philippine fishing boat kabahin usab sa operasyon ug mandato sa Philippine Navy nga magpabiling mabinantayon tungod sa mga nangaging insidente sa naglutaw nga drugas sa kadagatan sa nasud.
Kadudahan usab ang lihok sa bangka tungod kay wala kini makig-uban sa ubang mga mananagat ug nakit-an usab ang mananagat nga nag-inusara.
Gipasabot ni De Sagon nga bisan og walay mga fishing boat sa palibot sa na-intercept nga sakayan, wala gihapon nila isalikway ang posibilidad nga dili kini ang unang higayon nga nahitabo ang maong mga transaksyon human sa mga insidente nga natala sa miaging mga semana.
Samtang, padayon pa ang imbestigasyon sa Philippine Navy uban sa nagkadaiyang ahensya sa gobyerno aron mailhan ang mga nalambigit sa insidente.
