Wala pay nakita nga panginahanglan si Pangulong Ferdinand Marcos Jr nga ipatuman ang mandatory repatriation sa mga Filipino sa Israel ug Iran.
Kini maoy gipasiugda ni Presidente Marcos taliwala sa nagpadayong tensyon tali sa duha ka nasod sa Middle East.
Matod sa Pangulo, ila na lang itugyan sa mismong mga indibidwal o pamilyang Pilipino nga anaa sa maong duha ka nasod ang pagdesisyon kung gusto ba nila muoli sa Pilipinas o dili.
Gipasalig sa Presidente nga gimonitor sa gobyerno ang kahimtang sa atong mga kababayan sa duha ka nasud.
Gibutyag ni PBBM nga ang mga Pilipino sa Iran ug Israel nakontak og gipangutana na kung unsa ang ilang desisyon.
Ang uban nagpahibalo nga sila magpabilin didto sa pagkakaron, samtang ang uban gusto nga mobalik sa nasud.
Gihatagan og gibug-aton sa Presidente nga ang dakong hagit karon mao nga daghang mga tugpahanan ang gipasirad-an tungod sa kagubot, busa matud niya nangita sila og laing mga rota nga magamit pagbalik sa nasud.
