Libu-libo nga mga Iranian ang nagkagubot ug nagdali nga makabiya sa Tehran ug uban pang mga dakbayan human sa hulga sa bag-ong airstrike sa Israeli military batok sa ilang nasod.
Sa kapital nga siyudad sa Tehran, nakita ang taas kaayo nga linya sa mga sakyanan nga nagdungan og biyahe paingon sa kasadpang dapit, duol sa border sa Türkiye.
Sa ubang mga lungsod sama sa Shiraz sa south-central nga bahin sa Iran, nagpila ang mga sakyanan sa mga gasolinahan aron magkuha og suplay sa gasolina.
Daghang pamilya ang misakay og sakyanan uban ang ilang mga gamit ug pagkaon paingon sa kabukiran, palayo sa mga lugar nga posibleng maoy puntirya sa Israel.
Una nang mipagawas og pahimangno ang militar sa Israel, nga nanawagan sa mga residente sa Tehran nga mobiya dayon sa siyudad.
Giingon nila nga posibleng adunay operasyon sa mga mosunod nga oras aron targeton ang mga estruktura sa militar sa Iranian regime.
Padayon ang kahadlok ug kasamok sa mga kadalanan sa Iran, samtang ang mga embahada ug international agencies nagpabiling alerto.
