Gisugdan sa Department of Education (DepEd) ang School Year 2025-2026 kaniadtong Lunes, Hunyo 16, uban ang pag-abli sa klase alang sa milyon-milyon nga mga estudyante, kauban ang pilot nga pagpatuman sa bag-ong curriculum para sa Senior High School (SHS) sa kapin sa 800 ka mga eskwelahan sa nasud.
Sa bag-ong curriculum, ang core subjects gikunhoran gikan sa 15 ngadto sa 5 uban sa mosunod nga subjects: Effective Communication, Life and Career Skills, General Mathematics, General Science, and Study of Philippine History and Society.
Kini nga mga subject itudlo na karon sulod sa duha ka semestre aron mas mapauswag ang pagkat-on sa mga estudyante ug makunhuran ang ilang buluhaton sa akademiko.
Nasayran nga 841 ka pampubliko ug pribadong tunghaan ang gipili base sa ilang abilidad sa pagpatuman sa programa. Tumong sa DepEd nga mahimong mas andam ang mga estudyante alang sa kolehiyo ug trabaho.
Hinuon, si Rizal High School Principal Richard Santos nipadayag og kabalaka sa posibleng epekto sa mga magtutudlo ug pasilidad kung kini mapatuman. Matod niya nga posibleng maapektuhan ang teaching load sa mga magtutudlo ug makamugna kini og double shifting sa klase.
Ang Teachers’ Dignity Coalition nipagawas usab og pamahayag nga ang mga eskwelahan nga miapil sa pilot implementasyon kulang sa suporta, sama sa kakuwang sa mga classroom, learning materials, ug mga libro. Nanawagan usab ang National Union of Students of the Philippines og dugang pondo para sa edukasyon.
Samtang, gipahibalo ni Education Secretary Sonny Angara ang pag-abli sa 20,000 ka mga posisyon sa pagtudlo karong tuiga aron mapauswag ang kalidad sa edukasyon ug makunhuran ang gidak-on sa klase.
