Hingpit ug wlay paglubad ang Pilipinas nga nagsuporta sa resolusyon sa United Nations nga nanawagan sa hinanali, walay kondisyon ug permanenteng ceasfire sa gubat sa Gaza.
Niini, usa ang Pilipinas sa 149 ka nasod nga mibotar pabor sa resolusyon, 12 ang misupak samtang 12 ang ni-abstain.
Lakip sa mga nasud nga misupak mao ang Estados Unidos, Argentina, Hungary, Paraguay ug Israel, nga nagpadayon sa ilang opensiba sa Gaza, nga gituohan nga usa ka dangpanan sa mga militanteng Hamas.
Sa resolusyon nga gisagop sa UN General Assembly, kusganong gikondena niini ang bisan unsang porma sa kagutom sa mga sibilyan isip pamaagi sa pakiggubat ug ang dili makiangayon nga pagdili sa humanitarian access sa Gaza.
Gipahayag usab sa General Assembly nga ubos sa internasyonal nga balaod, ang Israel obligado sa pagsiguro nga ang humanitarian aid makaabot sa tanang mga tawo nga nanginahanglan sa Gaza ug nangayo sa diha-diha ug permanente nga probisyon sa luwas ug walay pugong nga mga entry point alang sa mga butang sa tibuok Gaza.
Gisubli usab niini ang pagpangayo niini alang sa hinanali ug walay kondisyon nga pagpagawas sa tanang nahabilin nga mga binilanggo nga gihuptan sa Hamas ug uban pang mga grupo.
