Nakit-an sa buntag sa Hunyo 6 sa Philippine Navy (PH Navy) ang usa ka barkong igugubat nga gipanag-iya sa People’s Republic of China, duol sa Panata Island nga nahimutang sa West Philippine Sea (WPS).
Base sa mga report, nakita nila ang Ma’anshan Jiangkai II-class frigate sa People’s Liberation Army Navy (PLAN), nga adunay bow number 525, samtang nagapadayon ang PH Navy sa ilang pagpatrolya sa maong bahin sa WPS.
Gibanabanaan nga ang barko sa China anaa sa distansya nga 4.6 nautical miles gikan sa BRP Andres Bonifacio, nga maoy gigamit sa PH Navy sa ilang regular nga maritime patrols.
Sa laing bahin, matod ni Col. Xerxes Trinidad, Chief sa Public Affairs Office (PAO) sa Armed Forces of the Philippines (AFP), makatulo ka higayon nga gibadlong ang maong warship pinaagi sa radio challenge o pagpahibalo sa radyo.
Kini nagpakita, sumala niya, sa lig-on nga baruganan sa AFP sa pagpanalipod sa soberanya ug exclusive economic zone (EEZ) sa Pilipinas.
Sa pagkakaron, padayon nga gi-monitor sa AFP ang presensya sa maong barko samtang nagpabilin ang ilang maritime patrols sa Kalayaan Group of Islands.
