Gikatakdang molarga si Department of Trade and Industry (DTI) Secretary Cristina Roque paingon sa Amerika sunod semana.
Naatol kini sa gitakdang panagtagbo sa mga opisyal sa pamatigayon ug ekonomiya sa Pilipinas uban sa administrasyon ni Trump aron matubag ang gipahamtang nga taripa.
Matod sa kalihim, gikan siya sa Manila paingon sa US karong Abril 29, kauban si Special Assistant to the President for Investment and Economic Affairs Secretary Frederick Go.
Wala gitumbok sa kalihim ang eksaktong petsa sa tigom sa mga opisyal sa US apan giingon nga kini ipahigayon sa dili pa sila mobalik sa Pilipinas karong Mayo 2.
Ang delegasyon sa Pilipinas makigtagbo sa mga trade guru sa Trump administration sama nila ni US Trade Representative (USTR) Ambassador Jamieson Greer ug Commerce Secretary Howard Lutnick.
Matod ni Sec. Roque nga ang nag-unang tumong sa tigom nga ipahigayon mao ang pagpaubos sa taripa ug paghatag og gibug-aton nga ang Pilipinas magpadayon sa lig-on nga relasyon niini sa Estados Unidos.
Kahinumduman nga unang gipahamtang ni US President Donald Trump ang 10 percent nga taripa sa tanang foreign-based goods nga dunay dugang reciprocal taripa sa mga nasud nga adunay trade deficit sa US.
Sa Pilipinas, mokabat sa 17% ang gipahamtang nga taripa, nga mas ubos kon itandi sa mga kakompetensya niini sa rehiyon sama sa Vietnam, Thailand, Indonesia ug Malaysia.
Bisan kung temporaryo nga gisuspinde ni Trump ang pagpahamtang sa mga reciprocal nga taripa sulod sa 90 ka adlaw, kini gikatakda nga tangtangon sa Hulyo.
