Gipalagpot na sa puwesto ang principal sa usa ka eskuwelahan sa Antique nga nag-viral human gipahubo ang toga sa mga estudyante sa usa ka graduation rites.
Kahinumdoman nga nahitabo ang insidente sa Colonel Ruperto Abellon National High School sa Laua-an, Antique kaniadtong Abril 15, 2025 kung asa nag-viral ang video sa pag-anunsiyo sa principal sa tulunghaan nga si Venus Nietes, nga dili angay magsul-ob og toga ang mga graduating student subay sa patakaran sa Department of Education (DepEd) nga himuong simple ang Graduation Ceremony.
Matod ni Palace Press Officer Atty. Claire Castro nga base sa direktiba ni Pangulong Ferdinand Marcos Jr. kang DepEd Secretary Sonny Angara,gipalagpot ang principal sa maong eskwelahan.
Giklaro ni Castro nga gipalagpot lamang siya isip principal sa eskwelahan apan lisensyado gihapon kini og mahimong makatudlo, bisan sutaon gihapon kung unsa ang klase sa iyang behavior ilabina nga usa siya ka magtutudlo.
Tun-an usab ni Secretary Angara kung angay nga pasakaan og kaso ang maong principal.
