Miapela karon og tabang kang Pangulong Ferdinand Marcos Jr. ang igsuon sa usa sa tulo ka Pilipino nga giaresto sa China tungod sa matod pa espionage o pagpangispiya para mapauli ang mga nasampit sa Pilipinas.
Matod sa igsuon nga babaye sa usa sa Pilipino nga mibalibad nga panganlan, gusto sa ilang pamilya nga mag-adto sa China para bisitahon ang ilang igsuon apan wala sila nasayod kung asa gibilanggo ang mga nasampit.
Gihingusgan usab niya nga may daghang kasayuran ang iyang igsuon sa mga balaod nga gipatuman sa China.
Ulahi matod pa nilang nakaistorya ang iyang igsuon kaniadto pang Nobiyembre 2024 nga paingon kaniadto sa Wenchang sa China para sa usa ka job interview.
Kahinumdoman nga giklaro sa National Security Council nga dili espiya ang mga nsampit ug pulos mga ordinaryong katawhang Pilipino nga walay military training.
