Andam atubangon ni kanhi President Rodrigo Duterte unsa man ang resulta sa trial sa International Criminal Court o ICC sa kaso niya may kalabotan sa maduguon nga drug war sa iyang administrasyon kaniadto.
Mihatag og mensahe ang kanhi Presidente sa tanang katawhan sa Pilipinas pipila ka minutos sa wala pa mitugpa ang gisakyan niya nga eroplano padulong sa The Netherlands kaganihang kaadlawon oras dinhi sa Pilipinas.
Miingon si Duterte nga dili lang mabalaka ang katawhan sa iyang kahimtang kay buhaton niini ang tanan aron protektahan ang kaugalingon kabahin sa gipatuman nga palisiya sa gubat kontra illegal nga droga dinhi sa Pilipinas.
Siya miingon nga gibuhat niya ang pag-atubang sa ICC diin nakasang-at ang mga reklamo batok kaniya kay kini ang iyang saad nga proteksyonan ang mga pulis ug mga sundalo nga nagbuhat lang sa ilang trabaho.
Nasayran nga anaa na sa The Netherlands si kanhi Pres. Duterte.
Nasayran nga paspas usab nga miapas si Vice Pres. Sara Duterte ug Davao City 1st District Cong. Paolo Duterte sa lokasyon sa ilang amahan sa maong nasud.
