Gipasidan-an sa China ang International Criminal Court (ICC) nga likayan ang politicization og double standards.
Kini human gidakoo si kanhi Pangulong Rodrigo Duterte pag-abot pa lamang niya sa nasod adlaw nga Martes, Marso 11 gikan sa Hong Kong, kung asa gi-serve sa mga pulis ang arrest warrant gikan sa ICC.
Sa usa ka briefing, gibutyag ni Chinese foreign ministry spokeswoman Mao Ning dihang mapangutana kalabot sa pagsikop kay ex-PRRD, nga hugot silang nakasunod sa development sa sitwasyon.
Giawhag usab sa China ang ICC nga ipatuman ang awtoridad niini nga nasubay sa balaod.
Ingon man ang pagpatuman sa “principle of complementarity” nga nagkanayong mahimo lamang mulihok ang ICC kung ang mga nasudnong korte ang dili mahimo o dili gustong mag-prosecute sa mga krimen.
Kung balikan, sa panahon sa pagdumala ni kanhi Pangulong Rodrigo Duterte, giduso niya ang pakighigala sa China pinaagi sa mas duol nga relasyon og kooperasyon sa Pilipinas og China sa nagkadaiyang mga isyu.
