Walay kausaban sa baruganan ni President Ferdinand Marcos Jr. kalabot sa missile system nga nakaposisyon sa South China Sea.
Kini maoy gipahibalo ni Palace Press Officer Atty. Claire Castro nunot sa paghagit sa China sa Pilipinas nga i-withdraw ang missile system niini sa South China Sea.
Sa press briefing sa Malacañang, si Castro niingon nga klaro ang pamahayag ni Presidente Marcos Jr. nga kon tumanon sa China ang gipangayo sa Pilipinas, mahimong konsiderahon ang tanyag sa China.
Apan kon padayon nga makasinati og pressure, harassment ug uban pang matang sa kapintasan ang Philippine Coast Guard ug mga mananagat sa Kasadpang Pilipinas, dili niya tangtangon ang mga missile system nga nabutang sa South China Sea.
Kahinumduman nga si Presidente Marcos Jr. nga kung mohunong na ang China sa pag-angkon sa mga teritoryo sa Pilipinas ug pagbangga sa mga barko sa gobyerno ingon man paggamit og mga laser, iyang ibalik ang Typhon missiles system sa America.
