Mga kabombo! Usa ka ba sa mga hanap ug mata ug dili gusto magsul-ob og antipara busa gipili ang contact lens? O ganahan ka ba nga mogamit ug contact lens isip imong disenyo sa mata?
Nakurat ang usa ka 33-anyos nga babaye human nadiskubrehan sa iyang mga doktor nga ang lima sa iyang nawala nga contact lens ang napilit sa luyo sa iyang wala nga mata!
Ang babaye gikatahong giila nga si “Ms. A” diin siya giingong miadto sa Plastic Surgery Hospital sa Chinese Academy of Medical Sciences aron matambalan ang hemifacial atrophy.
Giingong nadiskubrehan kini nga insidente dihang ilang gihimo ang operasyon sa kondisyon ni “Ms.A” diin ang katunga sa iyang nawong nagtakilid ug ang iyang wala nga mata medyo nilubog.
Ug isip solusyon, nakahukom ang mga doktor nga mag-inject ug tambok sa likod sa iyang mata aron mapuno ang nawala nga tissue.
Dinhi nadiskubrehan sa mga doktor ang lima ka lainlaing contact lens luyo sa eyeball sa mata sa pasyente. Matud ni Ms. A, namatikdan niya nga nawad-an siya og mga contact lens sa milabay nga mga bulan apan naghunahuna nga nasaypan lang niya kini.
Sa pagpasabot sa iyang kahimtang, ang hemifacial atrophy maoy hinungdan nga dunay luna sa likod sa iyang mata aron masulod niini ang contact lens.
Maayo na lang kay walay seryosong komplikasyon, apan matod sa mga doktor, mahimong mosangpot kini sa impeksyon o pagkadaot sa cornea kon dili dayon tangtangon.
Tungod niining talagsaon nga panghitabo, gipahinumdoman sa mga eksperto nga kinahanglang mohimo og makuti nga eksaminasyon sa mata sa dili pa magpa-opera, ilabi na sa mga pasyente nga kanunay mogamit og contact lens.
