Usa ka gamay nga tech nga kompanya sa Osaka, Japan ang naghimo ug usa ka pinasahi nga leave sa kompanya human kini nagtanyag sa usa ka talagsaon nga kaayohan sa mga empleyado, unsa kini? libre nga alkohol sa oras sa trabaho ug “hangover leave” aron makabawi sa tulog ug aron dili manakit ang ulo .
Tungod sa grabe nga kompetisyon sa pagkuha sa mga bag-ong empleyado ug limitado nga badyet alang sa taas nga sweldo, ang Trust Ring Co. Ltd., usa ka kompanya sa IT sa Midoribashi, Osaka, naghimo ug mamugnaong paagi aron madani ang mga fresh graduates Imbes nga patas-an ang suholan, nakahukom sila nga himoong mas “lingaw” ang ilang buhatan.
Niini nga kompanya, dili gidili ang pag-inom samtang nagtrabaho.
Adunay libreng beer machine ug liquor nga makuha sa mga empleyado bisan sa oras sa trabaho.
Ug kung ang mga cheers mosobra, ang hangover leave mahimong magamit aron ma-late, walay pangutana.
Matod sa CEO sa Trust Ring Co., limitado ang ilang pundo alang sa taas nga suholan mao nga nakahukom sila nga mohatag og mga benepisyo nga dili matupngan sa dagkong mga kompaniya.
Sa pagkakaron, epektibo kuno ang ilang stratehiya tungod walay ni-resign kanila sulod sa tulo ka tuig ug nagpabiling maayo ang performance sa kompanya. Ang suweldo sa usa ka bag-ong empleyado sa ilang kompanya kay 222,000 yen matag bulan, nga halos katumbas sa minimum nga sweldo sa Japan ug naglakip sa bayad sa 20 ka oras nga overtime.
Apan sumala sa pipila ka mga empleyado, ang pagka-flexible ug usa ka malipayong palibot sa pagtrabaho mas importante kanila kaysa taas nga sweldo.
Gawas sa “hangover leave”, aduna pa’y “loss leave” ang kompanya, diin mahimong mo-absent ang usa ka empleyado kung adunay mahitabong dili maayong mahitabo sa iyang giidolo nga singer, aktor o celebrity.
Sa padayon nga pagkunhod sa gidaghanon sa natawhan sa Japan, ang kompetisyon sa pagkuha sa mga bag-ong gradwado nahimong mabangis, nga nagpugos sa gagmay nga mga kompanya nga mahimong mamugnaon sa pagpangita sa mga empleyado.
Matod sa pipila ka eksperto, gawas sa taas nga suweldo, gipabilhan karon sa mga fresh graduated ang balanse sa trabaho-kinabuhi ug kagawasan sa pagbuhat sa ilang gusto sa trabaho.
