Ang Pinoy pole vaulter nga si EJ Obiena maoy midominar sa Metz Moselle Athletor sa France. Kini ang unang bulawang medalya nga nadaog ni Obiena sa pagsugod sa 2025. Ang maong kadaugan moabot usa ka semana human kini nakadaog og silver medal sa Jump Meeting Cottbus 2025 sa Germany.
Nakuha ni Obiena ang 5.70 metros nga clearance batok sa laing pito. Ang World number 4 misulay sa 5.85 metros nga paglukso apan wala molampos sa tanang pagsulay. Ang iyang 5.70 metros makonsiderar nga iyang season-best aron makab-ot ang unang gold medal sa tuig.
Nakatabla usab ang Dutch pole vaulter nga si Menno Vloon apan napakyas sa tie breaker maong mitapos siya sa ikaduha.
Sa ikatulong puwesto sa nahisgutang torneyo mao si Christopher Nilsen sa USA nga mihawod sa 5.60 metros.
Makigsangka dayon kini sa ISTAF Indoor sa Berlin karong Lunes. Kahinumduman nga mipahuway og pipila ka buwan si Obiena human sa Paris Olympics gumikan sa injury sa iyang likod.
