Gihatagan og presidential clemency ni US President Joe Biden ang 2,500 inmates. Apan kini pulos kombiktado sa non-violent drug crimes.
Gihimo kini sa Pangulo sa Amerika pipila ka adlaw una pa man mahuman ang iyang termino sa White House.
Matod kang Biden, ang maong mga indibidwal nagsilbi na og taas nga sentensya kumpara sa mga hukom nga gipahamtang sa mga nakasala karon ilawom sa balaod.
Kalabot niini gihatag ni Biden ang pardon og gipamub-an ang sentensya kung asa siya ang bugtong presidente sa Amerika ang mihimo niini.
Nasayran nga kaniadtong Disyembre 2024, gipamub-an usab ni Biden ang sentensya sa anaa sa 37 sa 40 federal inmates nga nag-atubang sa death penalty.
Gihimo na lang kini nga life imprisonment without parole.
Gianunsyo usab niya sa kaparehong bulan ang paghatag og pardon sa 39 ka convicted sa nonviolent crimes og gipamub-an ang sentensya sa halos 1,500 nga uban pa nga nagsilbi og mas taas nga tuig sa prisuhan.
Una nang gisaway sa pipila si Biden human hatagan og pardon ang iyang anak nga si Hunter nga guilty sa tax violations og na-convict sa firearms-related charges.
Samtang, tunga usab ang reaksyon dinhi sa mga US nationals, ilabina ang mga nahimong biktima sa mga nahimong krimen sa mga nahatagan og clemency.
