Gibalhin karong adlawang Lunes, Enero 13, ang trilateral phone call tali nilang nanday President Ferdinand Marcos, Jr., outgoing US President Joe Biden og Japanese Prime Minister Shigeru Ishiba.
Sumala sa Presidential Communications Office, ang US ang nag-request og adjustment sa meeting tungod gitutukan una ni Biden ang natigayong halapad nga sunog sa Los Angeles county sa California.
Kagahapon unta sa buntag ang nauna nga schedule sa ilang virtual meeting.
“The Trilateral Leaders’ Phone Call with the US President, the Prime Minister of Japan and the President of the Philippines has been moved to 7 a.m. on Monday, Jan. 13 (Manila time),” sumala sa Presidential Communications Office(PCO)
Wala gipagawas sa publiko sa Malacañang kung unsa ang mahimong agenda sa meeting apan gibutyag sa PCO nga magpagawas sila og statement kung mahuman na ang phone call.
May nauna nga reports nga posible hisgutan sa tulo ka mga lider ang ilang progress nga nahimo sa Philippines-Japan-US trilateral cooperation sukad nga gipahigayon ang makasaysayon nga trilateral summit sa Washington niadtong Abril 2024.
Mahitabo usab ang maong meeting taliwala sa tensyon nga dala sa China nga agresibo nga gyud sa pagsulod og paglayag sa EEZ sa Pilipinas.
Ang latest nga lakang sa China mao ang pagpadala sa ilang “monster ship” duol sa Capones Island sa Zambales.
